Cad a bheadh i gceist le euro digiteach?
Is foirm dhigiteach airgid thirim a bheadh in euro digiteach: modh leictreonach íocaíochta miondíola a bheadh eisithe againne, an Banc Ceannais Eorpach. Mar chineál airgid phoiblí, bheadh sé ar fáil saor in aisce do gach duine sa limistéar euro, le haghaidh aon íocaíochtaí digiteacha.
Sa lá atá inniu ann, níl teacht ag daoine ar airgead poiblí i bhfoirm dhigiteach. Inár sochaí atá ag éirí níos digitithe de réir a chéile, is é an euro digiteach an chéad chéim eile chun tosaigh a bheadh ann dár n-airgeadra aonair.
Ní cripteashócmhainn eile a bheadh ann
Ní bheadh euro digiteach ina chripteashócmhainn. Ní thacaíonn institiúid lárnach le cripteashócmhainní agus ní bhainistíonn institiúid lárnach iad, rud a fhágann go bhfuil riosca ag baint leo agus go bhfuil siad éagobhsaí. Níl aon chinnteacht ann go mbeidh tú in ann do chripteashócmhainní a mhalartú le haghaidh airgead tirim nuair a bhíonn gá agat leis.
Ina ionad sin, thacódh an institiúid chéanna a thacaíonn le do chuid airgid - muide, an Banc Ceannais Eorpach, le euro digiteach. Agus díreach cosúil le hairgead tirim, bheadh luach a aghaidhluacha i gcónaí aige.