23.10.2007   

MT

Il-Ġurnal Uffiċjali ta’ l-Unjoni Ewropea

C 248/1

1.1

Il-BĊE jilqa' l-abbozz tar-regolament billi dan jiċċara u jsaħħaħ il-prinċipji li fuqhom jinbena l-indiċi armonizzat tal-prezzijiet tal-konsumatur (HICP) u l-proċeduri tiegħu ta' teħid ta' kampjuni, ta' sostituzzjoni u ta' aġġustament ta' kwalita`, b'hekk jiżgura l-komparabbilta` u l-preċiżjoni. Billi jintroduċi l-kunċett tas-“segment tal-konsum skond l-iskop” bħala l-partiti fissi li għandhom jiġu segwiti mill-indiċi tal-prezzijiet, l-abbozz tar-regolament jiċċara l-bażi kunċettwali ta' l-HICP. Barra minn hekk, billi jipprovdi qafas u terminoloġija komuni dwar it-teħid ta' kampjuni, is-sostituzzjoni tal-prodott u l-aġġustament tal-kwalita`, jista' jiffaċilita aktar armonizzazzjoni f'dawn l-oqsma.

1.2

L-iżvilupp ta' standards speċifiċi għall-prodott għall-metodi ta' l-aġġustament tal-kwalita` jawgura titjib importanti. Il-BĊE japprova l-metodu adottat mill-abbozz tar-regolament biex jiġu stabbiliti standards għall-aġġustament tal-kwalita` skond kif ikun il-każ, u biex jiġu kklassifikati metodi alternattivi għall-aġġustament tal-kwalita` skond kemm dawn il-metodi jkunu xierqa. Madankollu, dawn l-istandards xorta jistgħu jħallu spazju għal prattiċi diverġenti bejn HICPs nazzjonali, għaldaqstant il-mira aħħarija għandha tkun l-armonizzazzjoni sħiħa tal-metodi ta' l-aġġustament tal-kwalita`. Barra minn dan, billi l-implimentazzjoni ta' standards miftiehma w effettivi hija kruċjali, il-BĊE jirrikkmanda bis-sħiħ li l-implimentazzjoni ta' l-abbozz tar-regolament tkun akkumpanjata b'rappurtar regolari dwar il-progress ta' l-implimentazzjoni tiegħu mill-Istati Membri, u b'superviżjoni stretta mill-Kummissjoni Ewropea biex tiżgura l-osservanza. Din is-superviżjoni għandha tara li tħeġġeg lill-Istati Membri biex japplikaw b'mod effettiv metodi-A għall-aġġustamenti tal-kwalita`, billi dan huwa l-aħjar mod biex tittejjeb kemm il-preċiżjoni ta' l-HICP u l-komparabbilta` ta' l-indiċi ġewwa l-Istati Membri. Jekk kieku jintwera li dawn il-miżuri mhumiex biżżejjed biex iwasslu għal-livell meħtieġ ta' komparabbilta`, il-BĊE jilqa' l-adozzjoni ta' miżuri, kif previst fl-Artikolu 1(3) ta' l-abbozz tar-regolament, biex l-istandards speċifiċi għall-prodott għall-aġġustament tal-kwalita` jsiru jorbtu legalment.

1.3

Il-BĊE jilqa' wkoll ir-regoli speċifiċi nklużi fl-abbozz tar-regolament għall-aġġustament tal-kwalita` u prattiċi relatati biex il-kampjun jiġi aġġornat. Madankollu, minħabba l-prattiċi nazzjonali diverġenti ta' bħalissa biex jiġu aġġornati l-kampjuni ta' l-HICP, jista' jkun diffiċli li tintlaħaq komparabbilta` sħiħa ta' l-HICPs fir-rigward tal-kwalita` rappreżentattiva u l-aġġustament tal-kwalita`. Il-BĊE għalhekk jinkoraġġixxi lill-Kummissjoni Ewropea biex tkompli taħdem lejn l-istabbilment ta' standards għall-aġġornament komparabbli ta' kampjuni għall-HICP.